O segmento da gama media en smartphones segue a ser un dos máis competitivos e esixentes, e o fabricante chinés quere deixar pegada nel cun novo lanzamento que promete destacar entre as alternativas dispoñíbeis. Falamos do vivo V50 Lite, que xa está dispoñíbel no noso país cun prezo de partida de 259 euros. Chega ademais cun atractivo conxunto de prestacións pensadas para quen busca rendemento, autonomía e fotografía sen gastar unha fortuna.
Batería de 6.500 mAh e carga rápida de 90W
O gran protagonista do vivo V50 Lite é a súa batería, cunha capacidade de 6.500 mAh que o converte nun dos móbiles con máis autonomía na súa gama. Segundo datos da marca, permite até 27 horas de reprodución de vídeo ou 14 horas de navegación web con só unha carga.
Ademais, o dispositivo inclúe carga rápida FlashCharge de 90W, permitindo acadar o 50 % de batería en só 23 minutos. E se iso fose pouco, tamén ofrece carga reversíbel, ideal para compartir batería con outros dispositivos. A marca asegura que, tras cinco anos de uso, a batería conservará máis do 80 % da súa capacidade.
Dobre aposta en fotografía: sensor Sony e gran angular
No apartado fotográfico, o V50 Lite tamén apunta alto: está equipado cun sensor principal Sony IMX882 de 50 MP, que promete imaxes nítidas e detalladas mesmo en condicións complicadas. Esta cámara principal inclúe zoom 2x, e vai acompañada dunha lente ultra gran angular de 8 MP, con campo de visión de 120°.
Un detalle que chama a atención é a incorporación da tecnoloxía Backlight Portrait, con luz auxiliar en forma de anel baixo as cámaras traseiras, ideal para retratos ben iluminados mesmo a contraluz. A iso súmase Aura Light, que mellora a iluminación do rostro de maneira suave e uniforme.
Dúas versións: 4G e 5G, e até 12 GB de RAM
O vivo V50 Lite chega en dúas configuracións principais:
- Versión 4G: con procesador Snapdragon 685, 8 GB de RAM e 256 GB de almacenamento por 259 euros.
- Versión 5G: con chip MediaTek Dimensity 6300, e dúas opcións:
- 8 GB + 256 GB por 329 euros
- 12 GB + 512 GB por 399 euros
A versión máis avanzada non só ofrece máis potencia e conectividade, senón que inclúe unha edición especial cun cargador FlashCharge de 90W e auriculares sen fíos TWS 3e, todo ao mesmo prezo. Un pack ideal para quen queira aproveitar ao máximo a experiencia de uso dende o primeiro día.
Con este V50 Lite, vivo reforza a súa posición como unha das marcas máis interesantes no competitivo mercado dos smartphones de gama media. Cun deseño coidado, funcións fotográficas intelixentes e unha autonomía que destaca, estamos ante un dispositivo que conxuga rendemento, estilo e prezo axustado, especialmente atractivo na súa versión especial con agasallos incluídos.
