O Pixel 9a de Google chegou ao mercado con moita expectación, pois continúa a tradición da marca de ofrecer smartphones de alta calidade co sistema operativo Android sen alteracións e unha integración perfecta co ecosistema Google. Cun prezo accesíbel en comparación cos dispositivos premium, este modelo de Google está deseñado para ofrecer ás usuarias unha experiencia fluída, intuitiva e de confianza.
Logo dunhas semanas con el, nesta análise imos examinar en detalle os aspectos que fan que o Pixel 9a se distinga entre os smartphones de gama media. Desde o seu deseño elegante e cómodo de usar, pasando polo rendemento impresionante grazas ao chip Google Tensor G4, até as cámaras de alta calidade que ofrecen resultados sorprendentes, o Pixel 9a é un dispositivo que impresiona en moitos aspectos. Sen máis preámbulos, imos adentrarnos en cada un dos apartados clave deste dispositivo.
Deseño e acabados
O Pixel 9a presenta un deseño moderno e minimalista que destaca pola súa ergonomía cómoda e práctica. Con dimensións de 154,7 mm de altura, 73,3 mm de anchura e 8,9 mm de grosor, este smartphone ten un agarre que se sente natural na man. Un dos detalles máis novidosos fronte ás xeracións anteriores é que as cámaras non sobresalen do corpo do dispositivo, o que mellora a estética xeral e evita posíbeis molestias cando o dispositivo está sobre unha superficie plana.
O panel traseiro está fabricado con material compostable mate, que non só é ecolóxico, senón que tamén ofrece unha mellor sensación ao tacto, mantendo o dispositivo libre de marcas dos dedos. O marco de metal satinado dálle un acabado premium que non se ve afectado pola súa gama de prezo accesible. O grao de resistencia IP68 asegura que o dispositivo pode resistir a auga e o po, o que o fai unha opción resistente para o uso diario.
A botoneira sitúase no lateral dereito do dispositivo, estando nunha posición superior o botón de acendido e na parte de abaixo os controis de volume. No lado inferior temos o conector USB-C, xunto coa bandexa extraíbel para as tarxetas SIM e o altofalante principal.
Hardware e rendemento
No interior do Pixel 9a, Google optou por integrar o chip Google Tensor G4, acompañado do coprocesador de seguridade Titan M2. Este procesador propio de Google proporciona un rendemento excelente, especialmente nas tarefas máis esixentes, como a edición de fotos e vídeos, xogos (aínda que para isto a pantalla antollóusenos un pouco escasa) e multitarefa xeral. A memoria RAM de 8 GB tamén garante unha experiencia fluída, sen os ralentizacións que poderían experimentarse en dispositivos de gamas máis baixas.
A combinación do Google Tensor G4 co coprocesador Titan M2 tamén mellora a seguridade e a protección contra ameazas. A súa memoria interna está dispoñíbel en 128 GB ou 256 GB, proporcionando suficiente espazo para todos os teus arquivos e app, sen opcións de ampliar o almacenamento mediante tarxetas microSD, como ocorre coa meirande parte dos dispositivos actuais.
Completan a folla de especificacións técnicas a conectividade 5G e WiFi 6E (2,4 GHz + 5 GHz + 6 GHz), ademais de Bluetotth 5.3 e, por suposto, NFC para pagos móbiles.
Pantalla
A pantalla do Pixel 9a é un dos seus puntos fortes, especialmente grazas ao panel pOLED de 6,1 polgadas, que ofrece unha resolución de 1080 x 2424 píxeles a 422,2 ppp. Esta resolución é perfecta para ver contidos en alta definición, navegar polas redes sociais ou xogar a títulos modernos sen que se perciban píxeles individuais. A taxa de actualización fluída que varía entre 60 e 120 Hz permite unha experiencia visual moi suave, especialmente ao xirar a pantalla ou facer scroll en longas páxinas. Iso si, de maneira predefinida vén cos 60 Hz, debendo activar manualmente a opción de 120 Hz se queremos exprimila ao máximo.
Ademais, a compatibilidade co HDR e a capacidade de acadar até 2700 nits de brillo máximo fan que a pantalla sexa visible mesmo a plena luz do día, sen perder detalle. A relación de contraste de 1.000.000:1 e a profundidade de 24 bits permiten que as cores sexan vibrantes e naturais, proporcionando unha excelente experiencia de visualización.
Cámara
O sistema de cámaras do Pixel 9a tamén destaca no seu rango de prezo. A cámara principal de 48 MP ofrece un gran angular de alta calidade, cun sistema de autoenfoque Dual Pixel e estabilización óptica de imaxe (OIS). Esta combinación garante fotos nítidas e claras en diferentes condicións de luz. Ademais, a cámara ultra gran angular de 13 MP permite captar máis do ambiente cun campo de visión de 120°, ideal para paisaxes ou fotos grupais.
Unha das mellores características da cámara do Pixel 9a é a súa calidade de zoom de alta resolución, que chega até 8 aumentos, mantendo unha gran definición mesmo a longas distancias. A cámara frontal de 13 MP tamén ofrece unha gran capacidade para capturar autorretratos nítidos, cun campo de visión ultra gran angular de 96,1°.
Google tamén inclúe varias funcións de software que melloran a experiencia fotográfica, como a Visión Nocturna, a Astrofotografía, o modo Retrato e o Borrador Máxico, que permite eliminar obxectos non desexados das fotos. Todo isto, xunto coas funcións de vídeo en 4K e estabilización mellorada, fai que o Pixel 9a sexa unha excelente opción na súa gama de prezos para quen presta atención ao apartado multimedia.
Software
Un dos grandes atractivos de calquera dispositivo Pixel é a experiencia de software limpa. O Pixel 9a vén co sistema operativo Android 15, sen modificacións nin bloatware, o que significa que as usuarias poden gozar dunha experiencia máis rápida e intuitiva. A integración de Google Assistant, as actualizacións rápidas e constantes, e as funcións exclusivas de Google, como VPN sen custo adicional, proporcionan unha experiencia fluída e segura.
Google tamén se destaca pola súa seguridade de extremo a extremo, asegurando que o Pixel 9a reciba actualizacións de seguridade durante 7 anos. Isto xunto co desbloqueo por pegada dixital e o recoñecemento facial, fai que o dispositivo sexa moi fiable en termos de protección dos datos.
Batería
A batería de 5100 mAh do Pixel 9a proporciona unha autonomía superior a 30 horas de uso continuo, o que é máis que suficiente para un día de uso intenso. Co modo de Aforro de Batería Extremo, a batería pode durar até 100 horas, o que é unha vantaxe en situacións de emerxencia.
Dispón de carga rápida (45W) e carga sen fíos (7,5W), o cal é un punto ao seu favor neste rango de prezos. Porén, botamos de menos que esta carga sen fíos fose máis rápida, xa que fica en desvantaxe fronte outras opcións. En calquera caso, consideramos positiva a súa inclusión.
Conclusións
Logo do noso período de probas, podemos dicir que o Pixel 9a é para nós unha das mellores opcións na súa gama de prezo. Con un deseño elegante e ergonómico, un rendemento impresionante grazas ao chip Google Tensor G4, e un sistema de cámaras de alta calidade, o Pixel 9a ofrece todo o que se pode desexar nun dispositivo de gama media, con funcións exclusivas de Google e unha experiencia de software limpa que facilita o uso.
A súa pantalla fluída, autonomía de batería e características de seguridade tamén o fan unha opción moi completa. En canto a prezos, está dispoñíbel en catro cores (lila, rosa, branco e negro) por 499 € na versión de 128 GB e por 599 € n de 256 GB.
