Samsung prepara unha importante mellora para a súa próxima xeración de smartphones da serie Galaxy S. Segundo datos de Macquarie Research, a serie Galaxy S26, que chegará en 2026, incluirá 16 GB de RAM como configuración estándar, marcando así un salto cualitativo en rendemento e capacidade multitarefa. Esta decisión chega logo das críticas recibidas pola escasa RAM da serie Galaxy S24, que levaron á compañía a ofrecer 12 GB en toda a gama S25.
O aumento da memoria RAM está directamente relacionado coa expansión da intelixencia artificial integrada nos dispositivos. As funcións de IA xerativa, como as que xa se están a implementar en Samsung e outras marcas, requiren máis memoria para executar procesos localmente sen depender da nube. Con 16 GB de RAM, até o modelo base dos S26 poderá manter máis aplicacións abertas ao mesmo tempo, realizar tarefas complexas en segundo plano e ofrecer unha experiencia de usuario máis fluída.
Competencia no mercado global
Este movemento de Samsung tamén responde á crecente presión dos seus rivais chineses, que xa están a apostar por especificacións de gama ultra-alta en modelos de prezo competitivo. Marcas como Xiaomi, Honor ou vivo levan tempo integrando altas cantidades de RAM, pantallas de última xeración e cámaras avanzadas, gañando terreo especialmente no mercado asiático.
Con esta actualización, Samsung non só busca recuperar vantaxe fronte a estes competidores, senón tamén consolidar a súa posición como líder en innovación nun mercado onde cada detalle conta. Esta transición aos 16 GB de RAM nos Galaxy S26 é unha resposta clara ás esixencias dunhas usuarias que cada vez pide máis dos seus teléfonos.
