Samsung segue preparando lanzamentos importantes para o que resta de 2025. Tras o éxito do Galaxy Unpacked e a presentación dos seus novos móbiles encartábeis, a compañía surcoreana ten outra carta na manga: o Samsung Galaxy S25 FE, a versión máis accesíbel da súa liña Galaxy S.
Segundo as filtracións, o Galaxy S25 FE verá a luz este outono, pouco despois do lanzamento do iPhone 17. E, a pesar de ser un modelo “Fan Edition”, contará con especificacións de alto nivel e algunhas novidades que o converten nun candidato moi atractivo para quen queira un gama alta sen gastar tanto.
Un deseño máis compacto e fino, pero con batería máis pequena
Un dos aspectos máis comentados é a redución da capacidade da batería, que pasará dos 4.700 mAh do Galaxy S24 FE aos 4.500 mAh do novo modelo. Samsung aposta por un dispositivo máis fino e lixeiro (161,3 x 76,6 x 7,4 mm e 190 gramos), o que explica este axuste. Con todo, a marca xa demostrou en ocasións anteriores que a eficiencia do procesador e da xestión enerxética poden compensar esta redución.
Como punto positivo, o Galaxy S25 FE mellora a carga rápida, ofrecendo 45W por cable (con cargador compatíbel) e 15W de carga sen fíos, facilitando así que as usuarias poidan recuperar batería en menos tempo.
Pantalla Dynamic AMOLED 2X e potencia Exynos 2400
O Galaxy S25 FE contará cunha pantalla de 6,7 polgadas Dynamic AMOLED 2X, con resolución 1080×2340 píxeles e taxa de refresco de 120 Hz, asegurando unha experiencia visual fluída e de alta calidade. A protección estará garantida grazas ao Corning Gorilla Glass Victus, aumentando a súa resistencia a golpes e rabuñadas.
No seu interior, atoparémonos co procesador Exynos 2400, unha evolución respecto ao modelo anterior que, xunto con opcións de 8 GB de RAM e almacenamento de 128 ou 256 GB, promete un rendemento á altura das expectativas dos usuarios máis esixentes.
Cámara principal de 50 MP e intelixencia artificial de última xeración
No apartado fotográfico, o Galaxy S25 FE traerá un sistema de triple cámara traseira:
- Sensor principal de 50 MP f/1.8 con estabilización óptica (OIS)
- Gran angular de 12 MP f/2.2
- Teleobxectivo de 8 MP f/2.4 con zoom óptico de 3 aumentos
Na parte frontal, disporá dunha cámara de 12 MP para selfies e videochamadas.
A gran novidade será a integración de Galaxy AI, incluída de serie en One UI 8 (baseado en Android 16), que achegará funcionalidades de intelixencia artificial avanzada como traducións en tempo real, subtítulos automáticos en chamadas e suxestións personalizadas baseadas no contexto de uso.
Resistencia IP68 e un papel clave na estratexia de Samsung
O Galaxy S25 FE chegará con certificación IP68, asegurando resistencia ao po e á auga, polo que será un dispositivo preparado para o uso diario en condicións esixentes.
A importancia deste modelo é maior que nunca: as filtracións apuntan a que Samsung eliminará o modelo base da serie Galaxy S26, que será substituído polo novo Galaxy S26 Pro, un dispositivo máis completo, pero tamén máis caro. Iso converte ao Galaxy S25 FE na opción de entrada á gama Galaxy S, sendo a alternativa máis económica para quen queira acceder ás prestacións premium de Samsung sen un gasto excesivo.
Cando chegará o Galaxy S25 FE?
Todo apunta a que o Galaxy S25 FE será anunciado oficialmente no outono de 2025, tras o lanzamento do iPhone 17. O seu prezo aínda non foi desvelado, pero posicionarase como a opción máis atractiva da gama Galaxy S para quen queira mobilidade premium a un prezo contido.
