A carreira por levar Android 16 aos smartphones está máis activa ca nunca, e Nothing acaba de dar un golpe sobre a mesa coa presentación de NOS 4.0, a súa nova capa baseada na última versión de Android. A compañía británica adiántase a outros fabricantes e pon o foco en tres piares: deseño refinado, integración da intelixencia artificial e melloras de usabilidade.
Un deseño máis claro e elegante
Nothing sempre destacou polo seu coidado estético, e con NOS 4.0 aposta por unha experiencia visual máis limpa e consistente. A pantalla de bloqueo recibe novos deseños de reloxos, mentres que o modo extra escuro busca dous obxectivos: ofrecer unha estética máis elegante e reducir o consumo de batería.
A interfaz Glyph, símbolo de identidade da marca, tamén se integra mellor no sistema, reforzando esa sensación de estilo único que caracteriza aos Nothing Phone.
O novo Panel de Uso de IA
Unha das grandes novidades de NOS 4.0 é o Panel de Uso de IA, unha ferramenta que permite comprender e controlar como se está a empregar a intelixencia artificial no dispositivo.
Este panel ofrece información sobre:
- Avisos de estado e privacidade, indicando cando a IA usa os nosos datos.
- Tendencias de uso diarias e semanais, para saber que funcións de IA activamos con máis frecuencia.
- Comparativas de actividade, facilitando unha visión detallada do comportamento da IA.
Con esta aposta, Nothing busca diferenciarse doutras capas de personalización poñendo a transparencia e o control das usuarias no centro da experiencia.
Multitarefa máis potente
A nova actualización tamén trae unha vista emerxente mellorada, que permite usar dúas apps flotantes á vez. Grazas a novos xestos, é posíbel minimizar unha xanela deslizando cara arriba ou pasala a pantalla completa deslizando cara abaixo.
Esta función cobra especial relevancia co uso de Gemini Live, permitindo ter nunha pantalla á IA conversacional e na outra calquera app da que precisemos información.
Lanzamento e dispoñibilidade
Segundo anunciou a compañía, NOS 4.0 chegará en breve aos dispositivos Nothing, aínda que non se especificou unha data exacta. O programa beta está previsto para finais de setembro, coincidindo co lanzamento dos novos Nothing Ear (3).
