En maio, MasOrange anunciaba en Sevilla o inicio do despregamento da súa rede 5G Advanced, unha tecnoloxía chamada a revolucionar a conectividade móbil e que servirá de antesala para o salto ao 6G. Cinco meses despois, ese proxecto é xa unha realidade: a compañía completou a implantación no Parque Científico e Tecnolóxico da Cartuja (PCT Cartuja), convertendo a capital andaluza na primeira cidade do Estado en contar con esta nova xeración de rede móbil.
Sevilla, pioneira en 5G Advanced
O 5G Advanced é a evolución natural do 5G actual, cun salto de rendemento que sitúa a MasOrange na vangarda da innovación. As probas realizadas no PCT Cartuja deron resultados excepcionais, con velocidades por usuario de até 5,2 Gbps e un rendemento moi superior aos estándares actuais.
O despregamento supuxo unha completa modernización da infraestrutura, coa implantación de novo hardware en bandas medias e baixas; o uso dos 140 MHz da banda de 3,5 GHz (a maior asignación dun operador en España) e a incorporación de antenas na banda milimétrica (26 GHz), o que supón unha multiplicación por dez da capacidade de transmisión, que agora acada os 10 Gbps.
Este proxecto enmárcase dentro da iniciativa eCity Sevilla, promovida pola Junta de Andalucía, o Ayuntamiento de Sevilla, o propio PCT Cartuja e Endesa, á que MasOrange se sumou como socio tecnolóxico estratéxico. O obxectivo é transformar o parque nun ecosistema aberto, dixital, descarbonizado e enerxeticamente autosuficiente, que sirva de referencia para o desenvolvemento das Smart Cities do futuro.
Grazas á infraestrutura de última xeración de MasOrange, o PCT Cartuja convértese nun espazo privilexiado para experimentar e desenvolver solucións baseadas en 5G SA e 5G Advanced, abrindo a porta a novas aplicacións en sectores como a industria, a enerxía, a mobilidade e a xestión urbana.
As vantaxes do 5G Advanced
O 5G Advanced ofrece prestacións moi superiores ao 5G tradicional:
- Velocidades de transmisión máis altas e latencias inferiores a 1 milisegundo.
- Capacidade para conectar milleiros de dispositivos simultaneamente.
- Cobertura e calidade de sinal óptimas incluso en contornas urbanas densas.
Entre as innovacións máis destacadas están o “sensing”, que permite detectar e rastrexar obxectos con precisión inferior a 10 cm, e o “5G New Calling”, que enriquece as chamadas de voz con funcionalidades multimedia en tempo real. Ademais, a mellora do protocolo RedCap optimiza a conectividade IoT, facilitando a dixitalización de empresas e administracións públicas.
Con este despregamento pioneiro, MasOrange pretende non só reforzar a súa posición como maior operador de telecomunicacións do Estado, senón que tamén dá un paso decisivo cara ao 6G, cunha rede máis eficiente, sostible e preparada para o futuro.
