Nos últimos anos asistimos a un axuste de prezos nas memorias SSD portátiles, unha tendencia que non só serviu para democratizar o acceso ás memorias máis avanzadas, senón tamén para converter estes dispositivos en alternativas moi atractivas para gardar, transportar e traballar con grandes cantidades de contido.
Xa non son produtos exclusivos dos profesionais da edición ou da fotografía: cada vez máis usuarias optan (optamos) por SSD externos fronte aos tradicionais discos mecánicos pola súa velocidade, fiabilidade e seguridade. Nese contexto chega a PNY RP60 Portable SSD, unha unidade que aposta abertamente pola máxima velocidade USB 3.2 Gen 2×2, un deseño lixeiro e moi resistente, e unha clara orientación ao uso profesional.
Nas últimas semanas estivemos a probar unha unidade deste disco duro, na súa versión de 1 TB, aínda que tamén está dispoñíbel nunha variante con maior capacidade (2 TB) para quen precise máis almacenamento. A continuación comentamos as nosas principais conclusións.
Deseño: compacto, robusto e pensado para viaxar
A PNY RP60 está construída para sobrevivir ao traballo diario, ás viaxes e aos escenarios menos amables. As súas dimensións (aproximadamente 5,5 x 9,5 x 1,2 cm de grosor) fan dela unha unidade moi compacta, que cabe sen problema en calquera peto ou funda dun portátil. A isto contribúe tamén o seu peso de só 53 gramos, que a converte nun dispositivo cómodo mesmo para quen leva múltiples accesorios enriba.
O chasis está completamente cuberto por unha goma rugosa, un acabado que incrementa a sensación de robustez e que ao mesmo tempo mellora o agarre. Non é un simple detalle estético: este deseño permite que a SSD soporte caídas de ata 3 metros, algo pouco habitual na súa gama de prezos. Iso si, tamén atrae motas de pó con bastante facilidade.
A protección non queda aí. A RP60 conta con certificación IP65, polo que está protexida contra po e chorros de auga, facéndoa apta para traballos en exteriores ou en condicións complicadas, se ben é un extremo que non probamos na nosa análise. O porto USB-C tamén está cuberto cunha tapa de goma para evitar que entre suciedade, e nunha das esquinas inclúese un oco para colgadores ou mosquetóns, ideal para fotógrafos, videógrafos ou técnicos que traballan en movemento.
Dentro da caixa atopamos un cable USB 3.2 Gen 2×2, necesario para obter o máximo rendemento que ofrece a unidade. Tamén podemos usar o software Acronis True Image Data Protection, unha ferramenta útil para xestionar copias de seguridade.
Rendemento: velocidade premium
Indo máis aló do deseño, o que realmente distingue a PNY RP60 de outras unidades da súa categoría é o seu rendemento. A marca promete até uns 2.000 MB/s en lectura e 1.800 MB/s en escritura teóricos, cifras que aproximan as probas en situacións reais de uso, e que converten a SSD nunha solución moi sólida para tarefas profesionais.
Este nivel de velocidade é posible grazas á utilización da memoria NAND Flash TLC combinada cunha porción que actúa como caché SLC e a interface USB 3.2 Gen 2×2, capaz de acadar 20 Gbps a través dun porto compatíbel.
O resultado é unha experiencia fluída e inmediata. En traballos profesionais, que implican mover arquivos de gran tamaño (arquivos RAW, vídeos en alta definición…), a unidade desprégase con enorme solvencia. A copia de varios gigabytesé cuestión de segundos, e mesmo en transferencias continuas mantense estable, sen sobrequecemento apreciable nin apenas caída de rendemento.
Para as usuarios que traballan con fluxos de edición en directo desde a SSD, a RP60 ofrece unha velocidade máis propia de unidades internas NVMe, o que permite abrir, modificar e exportar arquivos directamente desde a mesma sen sensación de latencia.
Unha ferramenta profesional a bo prezo
A PNY RP60 é unha das unidades SSD portátiles máis equilibradas do mercado en termos de prezo, rendemento e resistencia. Cun prezo de 120 € para a versión de 1 TB, sitúase nun segmento moi competitivo, destacando por ofrecer tecnoloxías avanzadas que non sempre atopamos nesta franxa.
O seu uso está especialmente indicado para profesionais (fotógrafos, videógrafos, creadores de contido, profesionais de IT), usuarias que viaxan moito e buscan unha unidade compacta e duradeira ou quen simplemente busca desfrutar de contidos multimedia directamente desde a SSD.
En conclusión, a PNY RP60 Portable SSD cumpre todo o que promete en termos técnicos, que combinados coa súa protección IP65 e resistencia a caídas conviértena nunha excelente opción para quen precisa velocidade real e durabilidade. Sen dúbida unha das mellores propostas do ano dentro da súa gama.
Este artigo contén enlace de afiliados. Se mercas o dispositivo, a ti sáeche ao mesmo prezo, e nós recibimos unha pequena comisión que nos axuda a manter este proxecto.
