OPPO segue a reforzar a súa aposta polos smartphones encartábeis e todo apunta a que 2026 será un ano especialmente intenso para a marca neste segmento. Segundo un novo rumor procedente dun insider da industria considerado fiable, a compañía chinesa non se limitará a lanzar un único modelos deste tipo este ano, senón que presentará dous modelos con formato libro e enfoques diferentes.
O primeiro será o OPPO Find N6, previsto para febreiro, mentres que en setembro chegaría o Find N7, un dispositivo que manterá a esencia do seu predecesor pero cun cambio clave no deseño.
OPPO Find N6: o seguinte paso na evolución do plegable tipo libro
O OPPO Find N6 apunta a converterse no novo buque insignia da marca no segmento encartábel. Segundo as filtracións, estará impulsado polo Snapdragon 8 Elite Gen 5, acompañado de 16 GB de RAM, unha configuración que o situaría no máis alto da gama en termos de rendemento.
No apartado da pantalla, o Find N6 contaría cun panel interno LTPO OLED de 8,12 polgadas, cunha taxa de refresco de 120 Hz, mentres que a pantalla externa acadaría as 6,62 polgadas, ofrecendo unha experiencia cómoda tamén co terminal pechado.
Un dos puntos máis destacados sería o sistema de cámaras, encabezado por un sensor principal de 200 MP, acompañado dun ultra gran angular de 50 MP e un teleobxectivo tamén de 50 MP, unha combinación pensada para competir de ti a ti cos mellores móbiles premium do mercado.
A todo isto sumaríase unha batería de 6.000 mAh, con soporte para carga rápida de 80 W por cable e 50 W sen fíos, mantendo ademais un peso contido de só 225 gramos, unha cifra especialmente salientable para un dispositivo plegable deste tamaño.
OPPO Find N7: mesmo ADN, pero cun formato máis ancho
A gran sorpresa chegaría en setembro co OPPO Find N7. Este modelo tamén sería un encartábel tipo libro, pero cunha diferenza clave: un deseño máis ancho, pensado para ofrecer unha experiencia máis natural en modo horizontal ao despregar o dispositivo.
Segundo a información dispoñible, o Find N7 conservaría boa parte das especificacións e da filosofía do Find N6, pero apostando por un formato que prioriza o uso en paisaxe, algo especialmente atractivo para multitarefa, consumo multimedia e produtividade. Este movemento indicaría que OPPO quere explorar novas proporcións de pantalla sen renunciar á identidade da súa gama Find N.
Dous encartábeis, dúas estratexias para un mesmo ano
De confirmarse estes lanzamentos, OPPO estaría a debuxar unha estratexia moi clara: ofrecer dous teléfonos encartábeis de alto nivel no mesmo ano, diferenciados principalmente polo deseño e a experiencia de uso, pero compartindo unha base tecnolóxica moi sólida.
Co Find N6 en febreiro e o Find N7 en setembro, a marca chinesa buscaría manter unha presenza constante no mercado dos modelos encartábeis ao longo de todo 2026, reforzando a súa posición nun segmento cada vez máis competitivo e no que o deseño e as proporcións da pantalla están a converterse nun factor decisivo.
