O novo vivo T5 Pro volve aparecer nas filtracións e cada vez deixa menos espazo para a sorpresa. O sucesor do T4 Pro apunta a converterse nun dos móbiles máis interesantes da gama media-premium, especialmente pola súa batería descomunal, pantalla fluída e un prezo moi competitivo.
Todo indica que vivo presentará este modelo na India a mediados de abril, cunha proposta que quere plantar cara a rivais como o Nothing Phone (4a)
Pantalla, procesador, batería e cámara
Segundo a nova filtración, o vivo T5 Pro chegará cun panel AMOLED de 6,8 polgadas, resolución 1.5K e unha taxa de refresco de 144 Hz. Esta combinación promete unha experiencia excelente tanto para multimedia como para xogos, cun nivel de fluidez moi por riba da media do segmento.
No apartado de rendemento, vivo apostaría polo Snapdragon 7s Gen 4, un procesador que encaixa perfectamente nun dispositivo que busca equilibrio entre potencia e eficiencia.
Pero o dato máis impactante está na batería: nada menos que 9.020 mAh. Estamos ante unha cifra moi pouco habitual nun smartphone convencional, que podería traducirse en dous días de autonomía sen despeitearse. A isto súmase carga rápida de 90W, polo que a enorme capacidade non debería penalizar demasiado os tempos de carga.
No apartado das cámaras, na parte traseira, a filtración apunta a unha cámara principal de 50 MP baseada no sensor Sony IMX882, unha opción solvente para fotografía diaria e vídeo.
Outro punto forte será a resistencia, xa que o terminal contará con certificacións IP68 e IP69+, ofrecendo protección avanzada fronte a po e auga, algo que cada vez pesa máis nas decisións de compra.
En canto a software, o vivo T5 Pro estrearase con Android 16 e a capa OriginOS 6, a interface propia de vivo, que destaca pola súa fluidez e personalización.
Dispoñibilidade e data de lanzamento
O dispositivo chegaría en dúas cores a mediados de abril: Glacier Blue e Cosmic Black, dous acabados clásicos pero elegantes.
As filtracións falan dun prezo na India que ao cambio sería duns 275 €, o que podería situalo arredor dos 300-350 euros no mercado europeo, un rango moi competitivo fronte a outros móbiles que apostan por deseño e autonomía.
Se esta información se confirma, o vivo T5 Pro ten ingredientes para converterse nun dos gama media máis relevantes deste trimestre.
