Xiaomi volve mover ficha no mercado dos dispositivos para a televisión co anuncio global do novo Xiaomi TV Stick HD 2nd Gen, un reprodutor compacto que chega como unha das opcións máis atractivas para modernizar televisores antigos con Google TV sen gastar demasiado.
O dispositivo foi presentado para o mercado internacional e todo apunta a que chegará moi pronto ao noso país, converténdose nunha alternativa especialmente interesante para quen busca unha experiencia completa de streaming, recomendacións intelixentes e acceso ás principais plataformas nun formato stick moi cómodo.
Un formato coñecido, pensado para calquera TV
O novo Xiaomi TV Stick HD 2nd Gen mantén a filosofía clásica deste tipo de dispositivos: conéctase directamente ao porto HDMI do televisor e aliméntase mediante USB. A gran vantaxe é que permite engadir Google TV a calquera pantalla antiga ou secundaria, ofrecendo unha interface moderna, rápida e centrada no contido.
Sen facer diso o eixo principal, é inevitable lembrar que esta proposta encaixa perfectamente no oco que deixou Google Chromecast para moitas usuarias que só querían unha solución económica e sinxela para streaming.
Google TV, Play Store e miles de apps
O stick de Xiaomi integra a última versión de Google TV, polo que ofrece acceso ás recomendacións personalizadas, perfís, integración cos servizos de Google e unha navegación moito máis intuitiva.
Na práctica, isto significa acceso directo a apps como Netflix, YouTube, Prime Video, HBO Max, Spotify ou Apple TV, ademais de miles de aplicacións adicionais desde a Play Store.
Tamén incorpora Google Cast, polo que se poden enviar vídeos, música ou fotos desde o móbil á tele dun xeito inmediato.
Mellor rendemento e compatibilidade con AV1
Un dos puntos máis interesantes desta nova xeración está no salto técnico. Xiaomi aposta por un novo procesador de catro núcleos Cortex-A55, acompañado por unha GPU Mali-G31 MP2, que segundo a marca ofrece unha mellora de rendemento do 38 % fronte ao modelo anterior.
Un detalle especialmente importante é a compatibilidade co códec AV1, cada vez máis usado en plataformas como YouTube para mellorar a relación entre calidade de imaxe e consumo de datos.
A nivel visual, tamén é compatible con HDR10+, mentres que no son suma Dolby Audio e DTS:X, algo moi útil se se combina cunha barra de son.
Como o seu nome xa deixa claro, estamos ante un modelo centrado en resolución Full HD (1080p), polo que non busca competir coas opcións 4K máis premium, senón converterse na mellor opción para televisores secundarios, habitacións ou pantallas máis antigas.
Isto tamén debería traducirse nun prezo especialmente competitivo, previsiblemente por baixo dos 69,99 euros do modelo 4K actual.
