OpenAI non quere quedar só no software. A compañía detrás de ChatGPT podería estar preparando un movemento estratéxico moito máis ambicioso: entrar de cheo no mercado dos smartphones cun dispositivo propio, deseñado arredor da intelixencia artificial.
Segundo as últimas filtracións, o plan pasaría por desenvolver procesadores personalizados en colaboración con MediaTek e Qualcomm, dous dos grandes nomes da industria. Estes chips estarían pensados especificamente para un futuro “móbil de IA”, cun lanzamento que podería producirse arredor de 2028.
Un smartphone centrado na intelixencia artificial
A idea de OpenAI non sería competir directamente en potencia bruta cos móbiles actuais, senón cambiar o foco cara á intelixencia artificial. O enfoque lembra ao que xa fai Google cos seus Google Pixel, onde a experiencia das usuarias está fortemente apoiada en capacidades de IA.
Neste caso, os novos procesadores priorizarían aspectos como a execución de modelos de IA en local, a eficiencia enerxética e a xestión da memoria. Iso permitiría que o dispositivo entendese de forma continua o contexto de cada usuaria, algo clave para asistentes máis avanzados e personalizados.
IA local e na nube: o equilibrio clave
Aínda así, non todo dependerá do hardware do dispositivo. Como xa ocorre actualmente, as tarefas máis complexas seguirán executándose na nube, onde a capacidade de procesamento é moito maior. O obxectivo sería atopar un equilibrio entre IA local, máis rápida e privada, e IA na nube, máis potente e versátil.
Este modelo híbrido é o que está marcando o futuro do sector, e OpenAI parece querer levalo un paso máis alá cunha integración total entre software e hardware.
Un dos puntos máis interesantes desta posible estratexia é o desenvolvemento de chips propios. OpenAI xa dera pistas nesta dirección co seu acordo con Broadcom para crear hardware destinado a centros de datos, pero agora o salto sería cara ao consumo.
As especificacións destes procesadores poderían estar listas entre finais de 2026 e comezos de 2027, o que encaixa cunha produción a gran escala en 2028. Ademais, tamén se fala da participación de socios industriais como Luxshare na fabricación.
Un novo competidor no mercado móbil
Se se confirma, a chegada dun smartphone de OpenAI suporía un cambio importante nun mercado dominado por marcas como Samsung, Apple ou a propia Google. A diferenza estaría no enfoque: mentres outros fabricantes integran IA nos seus dispositivos, OpenAI partiría da IA como eixo central.
Iso abre a porta a un novo tipo de experiencia móbil, onde o teléfono non só responde a comandos, senón que anticipa necesidades, comprende hábitos e actúa de forma máis proactiva.
Por agora, todo apunta a que estamos ante un proxecto en desenvolvemento, sen confirmación oficial por parte de OpenAI. Con todo, os movementos da compañía e o interese crecente pola integración vertical (hardware + software) fan que esta hipótese sexa cada vez máis plausible.
Imaxe: recreación de móbil de Open AI.
