DIGI continúa avanzando no seu plan para converterse no cuarto operador móbil con rede propia do Estado. A compañía pechou o primeiro trimestre de 2026 con máis de 900 nodos móbiles activos no conxunto do Estado, consolidando así a súa transición desde operador móbil virtual cara a un modelo con infraestrutura propia.
En Galiza, o despregamento tamén comeza a coller velocidade. Actualmente, DIGI xa conta con 32 antenas activas repartidas por distintas cidades e vilas galegas, un movemento que reforza a súa presenza nun mercado onde ata agora dependía case por completo das redes doutras operadoras.
32 antenas activas de DIGI repartidas por Galiza
O despregamento galego da rede móbil propia de DIGI abrangue xa as catro provincias. A distribución actual das antenas activas é a seguinte:
- Provincia da Coruña: A Coruña (3), Arteixo (1), As Pontes de García Rodríguez (1), Ferrol (3), Negreira (1), Noia (1), Ribeira (2) Santiago de Compostela (1)
- Provincia de Lugo: Chantada (1), Lugo (3)
- Provincia de Ourense: O Barco de Valdeorras (2), O Carballiño (1), Ourense (3), Verín (1), Xinzo de Limia (1)
- Provincia de Pontevedra: Lalín (1), Marín (1), O Porriño (1), Ponteareas (1), Pontevedra (1), Vilagarcía de Arousa (1), Vigo (1)
Este despregamento evidencia que DIGI está a priorizar tanto grandes cidades como núcleos intermedios e zonas estratéxicas para mellorar cobertura e capacidade da súa futura rede móbil propia, reducindo a dependencia de alugueiros.
De OMV a operador con infraestrutura propia
Ata hai pouco, DIGI operaba principalmente como OMV (operador móbil virtual), utilizando a infraestrutura de Telefónica para prestar servizo aos seus clientes.
Porén, a compañía leva tempo investindo fortemente en fibra, espectro radioeléctrico e infraestrutura móbil. Só no primeiro trimestre de 2026 destinou 119 millóns de euros a despregamentos e melloras tecnolóxicas.
O operador confirma ademais que xa funciona como MNO (operador móbil con rede propia), apoiándose tanto no seu espectro como en acordos de roaming nacional e compartición de rede.
A pesar do importante avance, DIGI aínda está lonxe da cobertura e capacidade das redes de Movistar, Orange ou Vodafone, que levan décadas despregando infraestrutura móbil.
Con todo, os plans da operadora romanesa son moi ambiciosos. A empresa pretende alcanzar as 5.000 antenas operativas en 2028 e chegar a longo prazo aos 10.000 puntos de emisión, unha cifra coa que xa podería competir en igualdade de condicións coas grandes compañías do sector.
Máis control da rede e mellor experiencia para os clientes
Dispoñer dunha rede móbil propia permite a DIGI reducir a súa dependencia de outros operadores, mellorar os custos operativos e controlar mellor a experiencia de uso dos clientes.
Esta estratexia encaixa co forte crecemento que a compañía está a rexistrar en España, especialmente grazas ás súas agresivas tarifas de baixo custe de fibra e móbil, que a converteron nun dos operadores que máis usuarias gañan ano tras ano.
O despregamento da súa rede propia, tamén en Galiza, será determinante para saber se DIGI consegue consolidarse como unha verdadeira alternativa ás grandes telecos tradicionais nos próximos anos.
