Chega Euro-Office, a alternativa europea a Microsoft 365 e Google Workspace que ten data de lanzamento

Europa quere reducir a súa dependencia das grandes tecnolóxicas estadounidenses e xa ten unha nova ferramenta para conseguilo. Chámase Euro-Office e preséntase como unha alternativa europea, aberta e gratuíta a solucións tan populares como Microsoft 365 e Google Workspace.

O proxecto, impulsado por varias empresas e organizacións europeas, estará dispoñible oficialmente a partir do 9 de xuño de 2026 e busca ofrecer unha experiencia familiar para quen leva anos traballando con Word, Excel ou PowerPoint, pero baixo unha infraestrutura e unha gobernanza plenamente europeas.

Unha resposta europea aos xigantes tecnolóxicos

Detrás de Euro-Office atópanse compañías e organizacións como IONOS, Nextcloud, OpenProject, XWiki, Soverin, Abilian e BTactic, entre outras entidades que forman parte da iniciativa EuroStack..

O seu obxectivo é crear unha suite informática na nube moderna e colaborativa que permita tanto ás administracións como empresas e particulares europeas traballar na nube sen ter que depender de provedores extranxeiros.

Que ofrecerá Euro-Office

Euro-Office está baseado en ferramentas de código aberto coñecido (as mesmas que LibreOffice), e ofrecerá na súa primeira versión (1.0) todas as ferramentas básicas que se esperan dunha suite de produtividade actual.

Isto inclúe un editor de documentos de texto, follas de cálculo e ferramenta de presentacións. Non lle faltan funcións como a edición colaborativa en tempo real, o acceso desde navegador e a compatibilidade cos formatos máis empregados.

A experiencia de uso é, segundo as súas responsábeis, moi semellante á que ofrece Office 365, co obxectivo de facilitar a transición e minimizar a curva de aprendizaxe para usuarias.

Dous modelos de implantación

Para poder empregar Euro-Office haberá dous modelos de implantación, unha vía autoxestonada e 100% de balde e outra a través de plataformas que nos ofrezan un servizo pechado.

A primeira está pensada tanto para usuarias como organizacións e administracións públicas que dispoñen de infraestrutura propia e coñecementos técnicos. A plataforma non require o pago de licenzas, ao ser un código aberto e accesible, pero necesítase instalalo nos propios servidores locais, para así poder telo integrado en plataformas privadas na nube.

Isto permítenos ter un control absoluto dos datos, xa que o espazo de almacenamento depende unicamente da capacidade dos nosos discos duros, aforrando cotas mensuais polo uso do servizo.

Para quen busca a comodidade de uso sen complicacións técnica, xa hai diversas empresas que van ofrecer Euro-Office integrado nas súas plataformas des produtividade. Aínda que non se fixo público, podemos imaxinar que este modelo funcionará con pagos semellantes aos de Google e Microsoft, xustificado polos custos que supón manter centros de datos seguros, ofrecer soporte técnico e garantir copias de seguridade redundantes.

Un dos máximos expoñentes deste modelo comercial e colaborativo é a plataforma office.eu. Este servizo integrará tamén desde o 9 de xuño o motor de Euro-Office dentro dun ecosistema completo na nube que inclúe, ademais, correo electrónico profesional, calendario, videoconferencia e almacenamento protexido baixo as estritas leis de privacidade da Unión Europea (RGPD).

Aínda que este tipo de plataformas adoitan incluír plans de proba ou modalidades básicas gratuítas para particulares, o seu núcleo de negocio enfócase en tarifas corporativas.

A soberanía dixital, máis importante que nunca

Pódese concluír que a principal diferenza entre Euro-Office e os seus rivais non está necesariamente nas funcións, senón no concepto de soberanía dixital. Nos últimos anos, gobernos e institucións europeas incrementaron a súa preocupación polo control dos datos, a localización das infraestruturas tecnolóxicas e a dependencia de empresas estranxeiras.

Isto resulta especialmente relevante para administracións públicas, universidades, organismos de investigación e empresas que manexan información sensible.

E aínda que resulta improbable que Euro-Office desbanque a Microsoft 365 a curto prazo, a súa aparición evidencia unha tendencia cada vez máis clara: Europa busca alternativas propias para infraestruturas e servizos dixitais estratéxicos.

Se consegue combinar unha boa experiencia de uso, compatibilidade cos estándares actuais e garantías en materia de protección de datos, a plataforma podería atopar un importante nicho de mercado en organismos públicos, centros educativos e empresas que apostan pola independencia tecnolóxica.

O próximo 9 de xuño marcará o primeiro gran exame para unha iniciativa que pretende demostrar que Europa tamén pode construír as súas propias ferramentas de produtividade na nube e competir nun mercado dominado historicamente por xigantes estadounidenses.

Imaxe de portada: creada con Gemini