Telefónica xa puxo en marcha o seu plan especial de verán en Galiza, unha campaña coa que a operadora reforzará a súa rede móbil nos meses de maior movemento turístico e de actividade cultural. A compañía anunciou actuacións ata o 15 de setembro para mellorar a cobertura en 74 eventos multitudinarios, optimizar infraestruturas, ampliar a rede en varios puntos do litoral galego e preparar un dispositivo específico ante a chegada do eclipse solar do 12 de agosto.
A iniciativa encaixa na estratexia da operadora para reforzar a conectividade nunha época de máxima demanda, cunha combinación de unidades móbiles con 5G de altas prestacións, tarefas de parametrización avanzada e novos despregues en zonas costeiras.
74 eventos en Galiza con reforzo especial de cobertura
Un dos eixos principais do plan de Telefónica será o apoio a eventos con gran afluencia de público. Entre xuño e setembro, a compañía monitorizará e optimizará a súa rede en 74 citas repartidas por toda Galiza, cun reparto por provincias no que destacan especialmente A Coruña e Pontevedra.
Segundo os datos facilitados pola operadora, o reforzo chegará a 23 eventos da provincia da Coruña; 19 na de Pontevedra; 11 na de Lugo; e 8 eventos na de Ourense.
Estas actuacións están pensadas para festivais, concertos, festas e grandes encontros culturais ou turísticos nos que a demanda de conexión móbil se dispara.
Unidades móbiles con 5G para soportar a máxima demanda
Para responder a estes picos de tráfico, Telefónica recorrerá a unidades móbiles equipadas con 5G de altas prestacións, dispositivos portátiles que actúan como un reforzo temporal da rede alí onde se prevé unha gran concentración de persoas.
A súa función é aumentar de maneira puntual a capacidade da rede e mellorar a velocidade de transmisión de datos, garantindo unha mellor experiencia de uso tanto para chamadas como para navegación, redes sociais, vídeo ou mensaxería en tempo real.
Desde a compañía explican que estas solucións permiten reforzar de maneira estratéxica a conectividade nos momentos de maior esixencia, algo especialmente relevante durante o verán, cando o turismo e os eventos multiplican o consumo de datos.
Novos despregues no litoral galego
Ademais do operativo ligado aos eventos, Telefónica tamén anunciou novas actuacións na costa galega, unha das áreas onde a presión sobre a rede adoita aumentar durante o verán.
O plan inclúe melloras e despregues en concellos como o da Coruña, Arteixo, Ferrol, Pontevedra e Sanxenxo. Unhas actuacións que buscan reforzar a conectividade en destinos que concentran unha parte importante do turismo estival en Galiza, especialmente durante xullo e agosto.
Cobertura especial para o eclipse solar do 12 de agosto
Outro dos elementos singulares do plan deste ano será o dispositivo técnico vinculado ao eclipse solar do 12 de agosto, un fenómeno que atraerá observadores de diferentes puntos do Estado e tamén do estranxeiro.
Telefónica confirmou que está a traballar no reforzo da cobertura nas localidades galegas onde o eclipse será especialmente visible, aplicando parametrizacións específicas para optimizar a sinal móbil e garantir que a rede poida responder con solvencia ante unha posible afluencia masiva de visitantes.
A operadora quere así anticiparse a un escenario no que milleiros de persoas poderían concentrarse en determinados puntos para seguir o fenómeno astronómico, cun incremento puntual do uso do móbil para compartir contido, facer directos, consultar información ou manter comunicacións.
Telefónica presume de liderado no 5G en Galiza
Este plan de verán chega nun momento no que Telefónica reivindica o seu peso na conectividade móbil no conxunto do Estado. A compañía asegura contar coa maior rede 5G do país, cunha cobertura superior ao 95% da poboación española e presenza en máis de 6.200 municipios.
No caso galego, a operadora sinala que a súa rede 5G xa alcanza tamén ao 95% da poboación e está dispoñible en máis de 280 concellos do país, tanto na banda de 700 MHz como na de 3.500 MHz, ou en ambas.
Isto permite ofrecer mellor cobertura en interiores e zonas máis amplas, pero tamén maior capacidade e rendemento en contornos con moita demanda de tráfico.
