A través dun vídeo subido á súa canle de YouTube, Huawei vén de filtrar o seu primeiro smartwatch, que será presentado oficialmente nun evento de prensa programado para mañá despois de comer. Falamos do Huawei Watch.
Aínda que as súas especificacións non foron dadas a coñecer, semella que estará na liña do resto de reloxos Android Wear en canto a hardware. Porén, o que si é relevante é o seu deseño, con esfera completa semellante á opción elixida por LG, e con único botón, que o fai especialmente fermoso.
Haberá tres acabados, en negro, prata e ouro, aínda que as combinacións multiplícanse coa posibilidade de intercambiar as correas con calquera estándar de 22 mm.
Mañá saberemos todos os detalles deste novo reloxo e do resto de trebellos que presentará Huawei, entre os que estará unha pulseira intelixente, tamén confirmada pola compañía nestes días previos.