Tras un tempo sen novidades no seu catálogo de tablets, Wolder vén de lanzar un novo modelo con pantalla Full HD de 10,1 polgadas. Trátase da nova Wolder miTab Pro+, un trebello preparado para traballar con vídeos en 360 graos que xa se atopa á venda por 179 euros.
Cun chasis fabricado en aluminio, a nova tablet de Wolder pesa tan só 535 gramos e ten un grosor de apenas 9,4 milímetros, o que fai que sexa un dispositivo bastante cómodo de portar. Incorpora unha pantalla de 10,1 polgadas Full HD (resolución 1920 x 1080 píxeles) con tecnoloxía multitáctil de 10 puntos, e dobre cámara, a traseira de 8 megapixeles e unha frontal de 5 megapíxeles, especialmente pensada para videochamadas.
No seu interior temos un proceasdor RK3368, con arquitectura Cortex A53 e chip de oito núcleos a 1,5 GHz. Está acompañado dunha memoria RAM de 2 GB e 32 GB de memoria interna, que poden ampliarse mediante tarxetas microSD dun máximo 128 GB.
A súa batería é de 8000 mAh, sen carga rápida, e a conectividade é Bluetooth 4.0 e WiFi. Tamén dispón de antena de radio FM e todo o necesario para poder disfrutar dos vídeos en 360 graos, algo que a compañía quere potenciar logo de ter lanzado hai algunhas semanas a cámara Globe 360.
A nova Wolder miTab Pro+ xa se pode mercar nos establecementos habituais por 179 euros.