Para gustos as cores ou os tamaños de tablets. E é que aos tamaños xa consolidados de 7 e 10,1 polgadas estanse a engadir nos últimos tempos outros intermedios, como as 8 da nova tablet da compañía Energy Sistem.
Trátase da Tablet i8, un dispositivo de apenas 500 gramos que conta cun procesador ARM Cortex A8 a 1 GHz, 1 GB de RAM e 8 GB de memoria interna, ampliábeis a través de tarxetas microSD de até 64 GB.
A súa batería é de 3800 mAh, que a priori parece algo escaso en relación co que podemos atopar nos dispositivos doutros fabricantes de tablets, e a conectividade é unicamente WiFi; malia todo, se o desexamos, poderemos conectarlle calquera módem 3G a través de USB. En canto ao sistema operativo, sae á venda con Ice Cream Sandwich e non sabemos se será actualizábel ou non a Jelly Bean.
A saída ao mercado agárdase para finais de mes, cun prezo de mercado de 185 €.
