Historicamente, unha das queixas máis importantes das usuarias de WhatsApp foi a falta de seguridade da aplicación. Porén, nos últimos tempos a compañía – hoxe en mans de Facebook – foi mellorando todos os aspectos relacionados con esta cuestión, mediante o cifrado das conversas que xa disfrutamos desde hai varios meses ou, agora, coa chegada da verificación en dous pasos.
Configurar WhatsApp nun novo dispositivo é un proceso bastante sinxelo, pois unicamente temos que coñecer o número de teléfono para poder recibir o SMS ou a chamada de activación. Isto tamén fai que o proceso sexa a maior fenda de seguridade que ten a aplicación, xa que ao non ter que introducir chaves de acceso calquera que puidera ter acceso ao noso teléfono podería roubarnos a conta. Por iso, quen queira dispór dunha barreira ante posíbeis intrusións alleas pode optar por activar esta nova dobre verificación.
O sistema máis habitual de implementar a dobre verificación (pensemos en servizos como Twitter) é mediante a recepción dun código no noso móbil a través de SMS. Porén, e por razóns obvias, este sistema non sería factíbel en WhatsApp por ser o mesmo método que se emprega na activación estándar, polo que a compañía apostou por establecer un PIN de 6 díxitos.
Como activar a verificación en dous pasos de WhatsApp
Se queremos activar a verificación en dous pasos que nos ofrece WhatsApp debemos realizar os seguintes pasos:
- Dentro da app, acceder aos “Axustes”.
- Entrar en “Opcións de conta”.
- Seleccionar “Verificación en dous pasos”.
- Seguindo os pasos que se nos indican, introduciremos un código PIN de 6 díxitos numéricos, reactivaremos a conta e introduciremos unha conta de email que nos servirá para reactivar a conta no caso de que esquezamos ese código PIN.
Seguinto estes pasos xa teremos a nosa conta de WhatsApp configurada coa verificación en dous pasos, de maneira que cada vez que instalemos a aplicación nun novo dispositivo pediranos ese PIN como paso extra no proceso de configuración. Así mesmo, cada certo tempo WhatsApp pediranos que introduzamos o noso código PIN para verificar que seguimos sendo nós quen emprega a conta no móbil.
Que vos parecen estas melloras?
Máis info | WhatsApp
