[Actualización] A EU retira a proposta de límites no roaming, aínda que a alternativa podería ser peor Ler máis.
Levamos moito tempo falando da chegada da fin do roaming en Europa, fixada para o próximo 15 de xuño de 2017. Porén, faltaba por coñecer cales serían as limitacións establecidas pola Comunidade Europea para evitar a pillaxe de contratar servizos noutros países.
Segundo informa El País, que tivo acceso ao borrador do documento elaborado por Europa, a política de uso razoábel establece que o límite será de 90 días de uso en roaming ao ano, ou 30 se se fai un uso ininterrompido da rede allea; é dicir, que antes de que transcurra ese prazo de 30 días debemos conectarnos á nosa rede doméstica. Unicamente quedarán fóra desta limitación as traballadoras transfronterizas, como poderían ser as persoas que van todos os días traballar de Galiza a Portugal ou viceversa.
Ademais, para aquelas persoas que teñen unha tarifa con chamadas ilimitadas ou un bono de datos, farase un baremo co promedio de consumo das clientas da operadora con esa tarifa en concreto, polo que sempre estando dentro dos límites estarase libre de recargos, mais cando se sobrepase poderase aplicar o cargo por roaming. Por poñer un exemplo, se o promedio son 100 minutos ao mes, cobraríase a partir do minuto 101, mesmo estando dentro dos 90 días, ou se o consumo medio fosen 3 GB, cobrarase a partir desa cantidade.
No noso país, Vodafone xa eliminou por completo o roaming, indo máis aló da proposta da UE, xa que tamén serve para países alleos á Comunidade Europea e Estados Unidos. Pola súa banda, Orange tamén moveu ficha, aínda que non cunha aposta tan firme como a de Vodafone.
